LameziaTerme.it

Il giornale della tua città

A Vijilia i Natali

1 min read
natale

Na festa d’aguri di manu sthringiuti.
Di fhimmini randi nthre cucini affriggiuti.
Di tavuli longhi e tuvagghj ammintati.
Di novi cosi e di bicchiriati.
N’adduru i fhrijutu nthra l’aria si spandi.
Su pronti i grispelli ppi tutti quanti.
Sardi e mullica dinthra a fhrissura.
Aspettanu da pasta a fhini i cuttura
U baccalà e l’angilli mpanati.
Fhrijuti assiami all alivi siccati.
Fhinuacchj spaccati arangi e nucilli
Cachissi maturi e lli pastilli.
Ciciari nuci e mandarini.
E cunzati ccu ariganu cci sunu i lupini.
Ncruccata allu cuallu di ogni guagghjuni.
C’è na curuna fhatta i turduni.
Ccu fhicu i stagioni belli siccati.
Sirvuti sunu i crucetti mpurnati.
A cunchjudimiantu da bella sirata.
Supra u tavulu è lla pignulata.
Thra na chjaccjara e nathra a sirata passava.
Aspittandu a campana quandu sunava.
Tutti alla missa a prigari e a cantari.
Ca a menzannotti arriva Natali.
Nu mbambiniallu accussì tantu duci.
Dinthra sta notti ha bbinutu alla luci.
All’adurari Giuseppi e Maria.
Dinthra na stalla ha nisciuti u Missia.
Purtandu paci spiranza e amuri
Illu ca è figghju di nosthru Signuri.

Antonella Muraca